Afmælisbörn 6. desember 2020

Einar Kr. Pálsson

Sex afmælisbörn eru á skrá Glatkistunnar í dag:

Grímur Atlason tónlistarmaður og margt annað, er fimmtugur á þessum degi og á því stórafmæli. Grímur hefur starfað með ótal hljómsveitum í gegnum tíðina, verið bassaleikari í sveitum eins og Drep, Dr. Gunni, Grjóthruni í Hólshreppi, Unun, Rosebud og Ekki þjóðinni og hefur gegnt stöðu framkvæmdastjóra tónlistarhátíðarinnar Iceland Airwaves svo eitthvað sé nefnt.

Steingrímur Þórhallsson tónskáld, organisti og kórstjóri er fjörutíu og sex ára í dag, Steingrímur sem hefur einnig gengið undir nafninu Stein Thor, sigraði í alþjóðlegri dægurlagasamkeppni undir því nafni en hann hefur einnig starfað í sönghópnum Rinascente sem sérhæfði sig í tónlist frá endurreisnartímanum og SMS-tríóinu sem lagði áherslu á barrokk tónlist. Það kemur því nokkuð á óvart að Steingrímur var meðal þeirra sem skipuðu hljómsveitina Reggae in ice í upphafi.

Gítarleikarinn Guðmundur Pétursson er fjörutíu og átta ára í dag en hann hefur verið landsþekktur síðan hann kom fram í kosningasjónvarpi Ríkisútvarpsins vorið 1987 en hann var þá aðeins fimmtán ára. Síðan þá hefur hann leikið inn á tugi ef ekki hundruð platna og er meðal virtustu gítarleikara landsins, ekki síst í blúsgeiranum. Guðmundur hefur ennfremur gefið út nokkrar sólóplötur.

Einar Kr. Pálsson bassaleikari úr Jonee Jonee er fimmtíu og níu ára gamall í dag. Hann átti þátt í að semja lög sveitarinnar sem birtust í Rokk í Reykjavík en starfaði einnig með sveitum eins og Spilafíflum (á hljómborð) og Haugi (á gítar) auk þess að leika á horn í Sinfóníuhljómsveit Norðurlands, þá hefur hann leikið á plötum listamanna eins og Megasar, Súkkat, Hendes verden og Óskar Óskarsdóttur. Einar hefur einnig fengist við tónlistarkennslu og samið kóratónlist en hefur lítið starfað við tónlist síðustu árin.

Þá á Tryggvi Tryggvason (Jóhannsson) hljóðvinnslumaður sem hefur starfað í Bretlandi mörg undanfarin ár sjötíu og átta ára afmæli. Tryggvi sem reyndar er rafmagnsverkfræðingur, er fæddur á Íslandi en fluttist ungur til Bretlands, hann starfaði um tíma við upptökur hjá Decca fyrirtækinu en hefur hin síðari ár starfrækt eigin fyrirtæki í bransanum og unnið til fjölda verðlauna og viðurkenninga í klassíska hluta fræðanna.

Að lokum er hér nefndur trúbadorinn Bjarni Tryggva frá Norðfirði sem er fimmtíu og sjö ára gamall á þessum degi. Bjarni vakti athygli á síðari hluta níunda áratugarins þegar hann sendi frá sér tvær sólóplötur en síðan varð bið á efni frá honum meðan hann m.a. flakkaði um Norðurlöndin til að spila. Þrjár plötur í viðbót hafa komið út með Bjarna en hann hefur búið erlendis síðustu árin.

Vissir þú að eitt sinn var starfandi hljómsveit sem hét NESKAMES sem stendur fyrir „Nú er svo komið að margir eru sárir“?