Afmælisbörn 15. desember 2021

Ragnheiður Gröndal

Í dag eru skráð fjögur afmælisbörn, þau eru þessi:

Söngvarinn Herbert Guðmundsson (Hebbi) er sextíu og átta ára í dag. Hann var áður söngvari fjölmargra hljómsveita eins og Pelican, Eikur, Raflosts, Tilveru, Sólskins, Ástarkveðju, Stofnþels og Kan svo nokkrar vel valdar séu nefndar en þekktastur er hann þó fyrir sólóferil sinn, fyrst og síðast skal þar nefndur stórsmellurinn Can‘t walk away (1985). Herbert hefur gefið út nokkrar sólóplötur.

Gunnar Sturla Hervarsson tónlistarmaður er fjörutíu og sjö ára gamall í dag en hann hefur komið að leiklistar- og tónlistarlífinu á Akranesi með margvíslegum hætti um langan tíma, s.s. með hljómsveitum eins og Abbababb, Frávik, Pegasus og Hvísl en einnig sem laga- og textahöfundur, leikstjóri, trúbador og margt annað.

Ragnheiður Gröndal söngkona er þrjátíu og sjö ára, hún hefur sungið marga stórsmelli á þeim ríflega tíu árum sem hún hefur verið í sviðsljósinu en hún vakti fyrst almenna athygli fyrir lag Páls Torfa Önundarsonar, Ferrari í undankeppni Eurovision og Ást eftir Magnús Þór Sigmundsson, bæði árið 2003. Síðan þá hefur hún átt stórt pláss í þjóðarhjartanu, og sungið fjölmörg lög sem hafa notið vinsælda. Ragnheiður hefur gefið út fjölda sólóplatna.

Guðlaugur Asberg Magnússon (1902-52) gullsmiður er hér að síðustu nefndur í upptalningu dagsins. Hann var trompetleikari og lék með lúðrasveitum á Ísafirði, Hafnarfirði og Reykjavík en einnig með danshljómsveitum á höfuðborgarsvæðinu sem og Symfóníuhljómsveit Reykjavíkur sem var einn undanfara Sinfóníuhljómsveitar Íslands, sem hann lék auðvitað einnig með. Guðlaugur var kom einnig að félagsmálum tónlistarfólks á fyrri hluta síðustu aldar.

Vissir þú að Anna Mjöll Ólafsdóttir hefur gefið út jóladjassplötu undir heitinu Christmas JaZZmaZ?