Afmælisbörn 3. september 2022

Pálmi Stefánsson

Afmælisbörnin í tónlistargeiranum eru sex talsins á þessu degi:

Bergur Thomas Anderson bassaleikari er þrjátíu og fjögurra ára gamall í dag. Bergur Thomas birtist fyrst í Músíktilraunum um miðjan síðasta áratug með hljómsveitum eins og Mors og Sudden failure 3550 error error en fyrsta þekkta sveit hans var Big kahuna, í kjölfarið kom Sudden weather change en í dag leikur hann með Grísalappalísu og Oyama, sem báðar hafa verið áberandi í íslensku tónlistarlífi.

Úlfur (Þórarinsson) Eldjárn tónlistarmaður og tónskáld er fjörutíu og sex ára í dag. Hann hefur stundum gengið undir nafninu Úlfur skemmtari og vakti fyrst athygli í unglingahljómsveitinni Kósý en hefur síðar starfað með sveitum eins og Traktor sem síðar varð að Trabant, Kanada og Orgelkvartettnum Apparat. Úlfur hefur jafnframt samið tónlist fyrir leikhús, sjónvarp og kvikmyndir og eftir hann liggja nokkrar plötur.

Tónlistarmaðurinn og fiskeldisfræðingurinn Guðmundur Valur Stefánsson er sextíu og sjö ára gamall á þessum degi. Guðmundur Valur hefur sent frá sér eina sólóplötu sem bar titilinn Valur en hann kom nokkuð fram sem trúbador bæði hér á landi og í Noregi þar sem hann bjó um tíma.

Ísfirðingurinn Salóme Katrín Magnúsdóttir Kraumsverðlaunahafi er tuttugu og sjö ára gömul í dag. Salóme Katrín er söngkona, píanóleikari og tónskáld sem sendi frá sér fimm laga smáskífuna Water árið 2020, hún hefur auk þess að starfa sem sólólistamaður verið í samstarfi við hljómsveitir eins og Lón og Skoffín.

Jóhann Eymundsson (fæddur 1927 á Patreksfirði) átti einnig afmæli þennan dag en Jóhann lék á harmonikku í Hljómatríóinu um sautján ára skeið á sínum tíma, tríóið lék m.a. undir hjá Alfreð Clausen á einni 78 snúninga plötu. Hann samdi einnig lög og tók þátt í sönglagakeppnum SKT. Jóhann lést 2007.

Að lokum er hér nefndur sjálfur Pálmi Stefánsson á Akureyri en hann lést árið 2021. Pálmi sem var fæddur 1936, starfrækti hljómsveitina Póló lengi vel sem og Hljómsveit Pálma Stefánssonar og lék þar á hljómborð og harmonikku en einnig á bassa og fleira með Hljómsveit Birgis Marinóssonar, Bandamönnum og Fimm félögum, hann rak ennfremur Tónabúðina og Tónaútgáfuna á Akureyri um árabil. Pálmi sendi frá sér sólóplötu árið 2004.

Vissir þú að Dóri DNA er barnabarn Halldórs Laxness?