Mamma

Mamma
(Lag / texti: erlent lag / Jónas Friðrik Guðnason)

Þegar líða fer að jólum vakna óskir börnum hjá,
já það er alkunn saga.
Og ósköp var það líkt hjá okkur stundum
hérna í gamla daga.
Fullt af óskum þá og draumum eins og nú,
sem mátti engum segja.
Þeir ólguðu í brjóstinu og skelfing
var oft sárt að þegja.

En mamma skildi flest.
Já, mamma hún var best.
Hún bætti öllu úr
svo undarlega fljótt.

Marga hluti þurfti að eignast eins og nú
en fáa aura að hafa.
Og enginn lét sig dreyma um að eignast
kannski fjölda gjafa.
En jólafötin nýju allir þurftu líka þá,
já það er gömul saga.
Og það var alltaf von á jólaketinum
í gamla daga.

En mamma vissi það.
Já, mamma kunni það.
Hún var í önnum oft,
þá aðrir sváfu rótt.

Þó ekki væri alltaf hægt að hlaupa út í búð
við höfðum nóg af flestu.
Til minninganna oft ég aftur sný
og á þá jólin bestu.
Við undum glöð við okkar þó að ekkert væri
borgað dýru verði.
Og enginn kann að undirbúa jólin
eins og mamma gerði.

Því mamma skildi flest.
Já, mamma hún var best.
Hún bætti öllu úr
svo undarlega fljótt.

Því mamma vissi allt.
Já, mamma kunni allt.
Hún var í önnum oft,
þá aðrir sváfu rótt

[af plötunni Björgvin Halldórsson og gestir – Allir fá þá eitthvað fallegt…]