Afmælisbörn 5. nóvember 2020

Um þetta leyti eru um sex ár síðan Glatkistan fór í loftið og í byrjun nóvember 2014 hófu „Afmælisbörn dagsins“ göngu sína. Af því tilefni birtist frá og með deginum í dag lítil klausa neðst í Afmælisbörnunum undir liðnum Vissir þú… en þar verður að finna stuttan (tilgangslausan) fróðleik um íslenska tónlistarsögu, eitthvað sem sumir vissu auðvitað fyrir en er nýtt fyrir öðrum. Vonandi kunna sem flestir að meta þessa viðbót.

Viðar Jónsson

Eitt afmælisbarn í tónlistargeiranum er skráð hjá Glatkistunni á þessum degi:

Viðar Jónsson tónlistarmaður er sjötíu og þriggja ára gamall í dag. Viðar hefur mestmegnis verið viðloðandi pöbbabransann í gegnum tíðina, hann hefur leikið og sungið með fjölda sveita til langs tíma auk þess að starfa eins síns liðs. Meðal sveita sem Viðar starfaði með má nefna Garða og Gosa, Plöntuna, Áhöfnina á Halastjörnunni, Kúrekana, Duo spez og Geisla. Um miðjan áttunda áratuginn sendi hann frá sér lagið Sjóarinn síkáti sem naut nokkurra vinsælda en Viðar hefur jafnframt sent frá sér nokkrar plötur, einn og í samstarfi við aðra.

Vissir þú að Elly Vilhjálms giftist um ævina þremur þekktum tónlistarmönnum, þeim Eyþóri Þorlákssyni gítarleikara, Jóni Páli Bjarnasyni gítarleikara og Svavari Gests slagverksleikara?