Afmælisbörn 28. október 2021

Sigrún Harðardóttir

Afmælisbörn dagsins eru sjö talsins að þessu sinni:

Egill Eðvarðsson er sjötíu og fjögurra ára gamall í dag. Egill er kunnastur fyrir störf sín hjá Sjónvarpinu en hann var einnig tónlistarmaður á árum áður, hann lék til að mynda með gjörningasveitinni Combó Þórðar Hall sem vakti mikla athygli á sínum tíma en aðrar hljómsveitir sem hann hefur starfað með eru t.d. Busabandið, Lubbar og Engir. Egill er faðir Egilssona í Steed Lord.

Snorri Guðmundsson tónlistarmaður er fimmtíu og átta ára gamall í dag. Snorri er kannski ekki allra þekktasti tónlistarmaður Íslands en hann hefur þó sent frá sér nokkrar plötur með tónlist sem myndi flokkast undir nýaldartónlist, sú fyrsta kom út 1999.

Hér er einnig nefndur Vilhelm Þór Harðarson söngvari hljómsveitarinnar Out loud frá Neskaupstað en hann er þrjátíu og níu ára gamall á þessum degi.

Frægasti sóttvarnarlæknir Íslandssögunnar, Þórólfur Guðnason er sextíu og átta ára gamall í dag en hann er einnig tónlistarmaður og hefur leikið á gítar og bassa með fjöldanum öllum af hljómsveitum í Vestmannaeyjum og á fastalandinu í gegnum tíðina, þeirra á meðal má nefna Bóbó Péturs & fjölskyldu, Takta, Bambinos, Eldvatn, Bítilbræður og Föruneyti Gísla Helgasonar svo fáeinar séu nefndar.

Tónlistarkonan Sigrún Harðardóttir er sjötíu og tveggja ára gömul í dag. Hún vakti töluverða athygli á áttunda áratug síðustu aldar fyrir söng sinn og gaf reyndar út tímamótaplötu árið 1976 sem var fyrsta íslenska breiðskífan sem hafði að geyma lög og texta eingöngu eftir konu. Sigrún hefur búið erlendis síðustu áratugina.

Jakob Ó. Jónsson söngvari átti þennan afmælisdag en hann lést fyrr á þessu ári. Jakob starfrækti lengi hljómsveit undir eigin nafni en hann söng einnig með sveitum eins og Echo, Hljómsveit Óskars Guðmundssonar, Lúdó sextett, Hljómsveit Jóns Páls Bjarnasonar, Tónatríóinu og ýmsum fleirum. Þess má geta að Hljómsveit Jakobs Jónssonar starfaði allt þar til fyrir fáeinum árum.

Jóhanna Jóhannsdóttir Johnsen sópransöngkona (1908-96) hefði átt afmæli á þessum degi en hún þótti efnileg söngkona á sínum tíma, Jóhanna nam söng hér heima og í Kaupmannahöfn auk píanóleiks. Þegar hún kom aftur heim til Íslands fékkst hún töluvert við söng- og píanókennslu, hún hélt hér einsöngtónleika og tók þátt í óperettu- og söngleikjauppfærslum. Söngferli hennar lauk hins vegar nokkuð skyndilega þegar eiginmaður hennar sem var læknir þurfti að flytjast út á land og gegna starfi héraðslæknis víðs vegar um landsbyggðina.

Vissir þú að Bergþóra Árnadóttir samdi sitt fyrsta lag aðeins sex ára gömul?