Afmælisbörn 20. mars 2015

Þorbjörg Roach

Þorbjörg Roach

Afmælisbörnin tónlistartengdu eru fjögur talsins í dag:

Tónskáldið Finnur Torfi Stefánsson er 68 ára, hann hefur samið fjölbreytilega tónlist og má þar nefna óperu, hljómsveitaverk og verk fyrir einleikshljóðfæri, kammertónlist og rokk en á árum áður var hann í fjölmörgum hljómsveitum á tímum bítla og blómabarna. Þekktustu sveitir hans eru Óðmenn og 5-pence en einnig lék hann með Persónu, Rjóma, Tónabræðrum, Tónum og Töktum.

Gísli Rúnar Jónsson leikari er 62 ára en hann hefur komið víða við í tónlist þótt fyrst og fremst hafi hann verið skemmtikraftur. Tvær plötur hefur hann gefið út sem kalla mætti sólóplötur en einnig komu út plötur þar sem hann var í samstarfi við Halla og Ladda, með Júlíusi Brjánssyni sem Kaffibrúsakarlarnir og með Stefáni Karli Stefánssyni. Þá eru ótaldar plötur með tónlist úr söngleikjum og leikritum.

Þorbjörg Roach Gunnarsdóttir hljómborðsleikari úr Retro Stefson er 25 ára, hún hefur einnig leikið á harmonikku í minni hljómsveitum.

Jökull Júlíusson söngvari og gítarleikari Kaleo úr Mosfellsbænum er einnig 25 ára en flestir þekkja hljómsveit hans, hann hefur einnig verið í hljómsveitinni St. Peter the leader. Færri vita að hann lék og söng á plötu föður síns, Júlíusar Hjörleifssonar fyrir nokkrum árum.