Afmælisbörn 4. maí 2015

jakob Magnússon1

Jakob Frímann Magnússon

Í dag koma fjögur afmælisbörn við sögu Glatkistunnar og þar af er eitt stórafmæli:

Adda Örnólfs (Arnbjörg Auður Örnólfsdóttir) söngkona er áttræð á þessum degi en hún er kunnust fyrir upphaflegu útgáfuna af laginu um Bellu símamær. Adda kom upphaflega frá Suðureyri en fluttist á unglingsárunum til höfuðborgarsvæðisins, þar sem hún vakti fljótlega athygli fyrir söng sinn. Hún söng inn á nokkrar 78 snúninga hljómplötur en oftast var það ásamt Ólafi Briem. Söngferill Öddu var stuttur og hætti hún að mestu að syngja opinberlega fyrir 1960.

Jakob Frímann Magnússon er 62 ára gamall. Hann er auðvitað einna þekktastur fyrir framlag sitt með Stuðmönnum en Jakob á ennfremur sólóferil sem spannar um tug platna. Hann lék á árum áður með öðrum sveitum eins og Rifsberju, Bone symphony, Hvítárbakkatríóinu (White Bachman trio), Madrigal, Razzmatazz, Sköpum, Change og fleiri sveitum auk þess að koma að ótal öðrum tónlistartengdum verkefnum hérlendis og erlendis.

Móeiður Júníusdóttir söngkona er fjörutíu og þriggja ára gömul í dag. Hún vakti fyrst athygli með framlagi sínu til fyrstu söngkeppni framhaldsskólanna sem haldin var 1990. Síðar átti hún eftir að syngja í hljómsveitum eins og Jazzbandi Reykjavíkur [2] (ásamt Páli Óskari), Bong, Jetz og Lace, auk þess að gefa út sólóplötur. Móeiður er guðfræðingur í dag og hefur minna fengist við sönglistina hin síðari ár.

Ingólfur (Ingó) Júlíusson gítar-, bassa- og hljómborðsleikari, og ljósmyndari átti einnig afmæli á þessum degi en hann lést árið 2013, hann hefði orðið 45 ára í dag. Meðal hljómsveita sem Ingólfur lék með voru pönksveitirnar Q4U og Niður en hann var einnig kvikmyndagerðarmaður og vann m.a. að gerð tónlistarmyndbanda.