Afmælisbörn 21. september 2016

Linda Gísladóttir

Linda Gísladóttir

Í dag eru fjögur afmælisbörn á skrá Glatkistunnar:

Atli Heimir Sveinsson tónskáld er sjötíu og átta ára gamall í dag. Atli Heimir nam píanóleik við Tónlistarskólann í Reykjavík og stundaði síðan tónfræði- og tónsmíðanám í Þýskalandi á árunum í kringum 1960. Hann kom heim að loknu námi og kenndi m.a. við Tónlistarskólann í Reykjavík og starfaði við Ríkisútvarpið. Meðal verka sem hann hefur samið eru óperan Silkitromman, kórsvítan Haustmyndir, tónverkið Tíminn og vatnið og svo fjöldinn allur af sönglögum sem margir þekkja. Atli Heimir hefur einnig sinnt ýmsum félagsstörfum í þágu tónlistarinnar.

Áshildur Haraldsdóttir flautuleikari er fimmtíu og eins árs í dag. Áshildur hefur komið víða við í tónlist sinni, verið í aukahlutverkum á plötum annarra listamanna en einnig gefið sjálf út nokkrar sólóplötur, m.a. í samstarfi við annað afmælisbarn dagsins, Atla Heimi, og einnig Selmu Guðmundsdóttur, svo fáein dæmi séu tekin.

Þriðja afmælisbarnið í dag er Rúnar Þór Pétursson en hann er sextíu og þriggja ára gamall. Rúnar Þór á að baki langan sólóferil sem spannar vel á annan tug sólóplatna en hann hefur líka starfað með mörgum hljómsveitum síðan hljómsveitaferill hans hófst á Ísafirði með Blackbird en í kjölfarið hafa komið sveitir eins og Jana, Xplendid, Fjötrar, 3. Hæðin, GRM og nú síðast Klettar.

Að síðustu er hér nefnd söngkonan Linda Gísladóttir sem margir muna eftir úr Lummunum, hún er sextug og á því stórafmæli dagsins. Linda söng með hljómsveitum eins og Cirkus, Jazztríó Guðmundar Ingólfssonar, Haukum, Vindlum Faraós og Bláa fiðringnum. Hún hafði fyrst sungið inn á plötur með Gylfa Ægissyni og Róberti bangsa og kom síðar við sögu á nokkrum slíkum, en Linda gaf sjálf út sólólpötu árið 1978, sem bar nafn hennar.