Afmælisbörn 24. desember 2018

Aðfangadagur jóla hefur að geyma tvö tónlistartengd afmælisbörn:

Jóhann R. Kristjánsson tónlistarmaður frá Egilsstöðum er fimmtíu og sjö ára gamall í dag. Jóhann er ekki þekktasti tónlistarmaður þjóðarinnar en plata hans, Er eitthvað að? frá árinu 1982 hefur öðlast cult-sess meðal poppfræðinga. Á sínum tíma galt platan afhroð gagnrýnenda en hefur nú fengið uppreisn æru, og er í dag eftirsóttur safngripur.

Heimir Sindrason tannlæknir á einnig afmæli í dag en hann er sjötíu og fjögurra ára gamall. Heimir átti stuttan en gæfuríkan feril sinn sem tónlistarmaður um tvítugt er hann starfrækti þjóðlagadúettinn Heimir og Jónas ásamt Jónasi Tómassyni á meðan þeir voru við nám við Menntaskólann í Reykjavík, þeir gáfu út tvær breiðskífur en Heimir hefur einnig gefið út tvær sólóplötur síðan, um og eftir síðustu aldamót. Þess má geta að Heimir samdi lagið Hótel jörð við ljóð Tómasar Guðmundssonar.

Auglýsingar