Flower power (1995-96)

Hljómsveitin Flower power var að öllum líkindum ekki starfandi hljómsveit heldur samstarf nokkurra tónlistarmanna í hljóðveri sem gerðu nýja útgáfu af Kanínunni (Hey kanína) sem ísfirska hljómsveitin Ýr hafði pikkað upp úr erlendri útvarpsstöð mörgum árum fyrr og Sálin hans Jóns míns einnig gert skil nokkru síðar.

Reyndar var Rafn Jónsson (úr Ýr) meðal flytjenda lagsins í þetta sinn og einnig Jens Hansson (úr Sálinni) en aðrir sem komu að Flower power voru Egill Örn Rafnsson (sonur Rafns) sem lék á sneril, Rúnar Örn Friðriksson söngvari (Sixties o.fl.) og Kristjana Stefánsdóttir sem annaðist bakraddir.

Lagið kom tvívegis út á safnplötum sem útgáfufyrirtæki Rafns (R&R músík) sendi frá sér, fyrst á H-spennu (haustið 1995) og svo Ávöxtum (vorið 1996).