Afmælisbörn 21. desember 2014

Pétur Á. Jónsson

Pétur Á. Jónsson

Og þá eru það afmælisbörnin í dag:

Pétur Grétarsson slagverksleikari er 56 ára, hann hefur mest tengst djassgeiranum og hefur leikið með ýmsum sveitum. Þar má til dæmis nefna Stórsveit Reykjavíkur, Tarzan, Arnald og kameldýrin, Karnival, Havanabandið og Smartband. Pétur hefur mikið starfað við kvikmyndir og leikhús, og leikið á hinar ýmsu plötur sem sessionleikari.

Regína Ósk Óskarsdóttir söngkona er 37 ára. Hún vakti fyrst athygli í Áttavillt og Söngsystrum en áður hafði hún verið í Doríu og fleiri sveitum. Í seinni tíð hefur henni brugðið fyrir í Nova, Eurobandinu og Frostrósum en hún hefur einnig gefið út sólóplötur og sungið á plötum annarra tónlistarmanna. Regína er þekktust í dag fyrir Eurovision framlag sitt en hún hefur einnig sungið í Landslaginu, Ljósalaginu og öðrum smærri söngkeppnum.

Pétur (Árni) Jónsson óperusöngvari (1884-1956) hefði átt afmæli þennan dag en hans er í dag minnst sem þess Íslendings sem fyrstur gaf út plötu (1910). Pétur gaf út á sjötta tug 78 snúninga platna en hann starfaði lengst af í Þýskalandi.