Afmælisbörn 8. febrúar 2016

Kolbeinn Ketilsson

Kolbeinn Jón Ketilsson

Afmælisbörnin eru fjögur talsins í dag:

Fyrstan skal nefna Jónatan Garðarsson tónlistarséní sem er sextíu og eins árs en hann hefur verið viðloðandi tónlist í áratugi með einum og öðrum hætti. Hann hefur verið í hljómsveitum, samið lagatexta, skrifað um tónlist, komið að félags- og réttindamálum tónlistarmanna og er það sem almennt er kallað – tónlistarnörd eða poppfræðingur.

Valgarður (Þórir) Guðjónsson söngvari Fræbbblanna er fimmtíu og sjö ára ára gamall í dag, hann hefur sungið með fleiri hljómsveitum en flestar eru þær í pönkgeiranum og tengjast Fræbbblunum, þar má nefna Mamma var Rússi, Glott, Fitlarinn á þakinu.

Kolbeinn Jón Ketilsson tenórsöngvari er fimmtíu og fjögurra ára gamall á þessum degi. Kolbeinn nam söng fyrst hér heima en síðan í Vín í Austurríki og hefur sungið ýmis konar óperu- og önnur sönghlutverk á ferli sínum, víðs vegar í Evrópu. Hann býr og starfar í Þýskalandi, syngur reglulega hér heima og hefur sent frá sér eina plötu.

Svala Karítas Björgvinsdóttir (Svala Björgvins) er þrjátíu og níu ára, hún varð þekkt aðeins tíu ára þegar hún söng lagið Fyrir jól á jólaplötu föður sín, Björgvins Halldórssonar. Síðar var hún í hljómsveitum eins og Magic mushrooms og Scope en hefur undanfarin ár starfað í Bandaríkjunum með hljómsveit sinni, Steed Lord. Svala hefur gefið út sólóplötur og reyndi fyrir sér sem sólóisti vestan hafs um tíma en hún var einn af dómurum The Voice nýlega.