Afmælisbörn 18. mars 2016

Guðmundur Óli Pálmason

Guðmundur Óli Pálmason

Eftirfarandi eru tvö afmælisbörn á lista Glatkistunnar:

Selfyssingurinn Einar (Þór) Bárðarson, oft nefndur umboðsmaður Íslands, er fjörutíu og fjögurra ára. Einar hefur komið víða við í tónlistarlegum skilningi en þekktastur er hann þó fyrir umboðsmennsku fyrir Nylon. Hann hefur einnig sinnt umboðsmennsku fyrir ýmsa aðra, samið tónlist (m.a. Ertu þá farin? með Skítamóral og Eurovision framlagið Birta / Angel), haldið tónleikaviðburði og komið að menningarviðburðum frá ýmsum hliðum. Einar lék og söng sjálfur með hljómsveitum í gamla daga, má þar nefna Dansband E.B. og Tomma rótara.

Trommuleikarinn Guðmundur Óli Pálmason á einnig afmæli í dag en hann er þrjátíu og átta ára gamall. Guðmundur Óli lék lengst af með hljómsveitinni Sólstöfum og var reyndar einn af stofnendum sveitarinnar í ársbyrjun 1995, hann lék með Sólstöfum á annan tug smá- og breiðskífna en var rekinn úr hljómsveitinni í ársbyrjun 2015 svo úr varð nokkurt fjölmiðlafár.