Afmælisbörn 1. september 2016

Katrín Viðar2

Katrín Viðar

Að þessu sinni eru afmælisbörnin fjögur talsins:

Ruth Reginalds söngkona er fimmtíu og eins árs gömul í dag en hana þekkja auðvitað allir. Ruth var fyrst og fremst barnastjarna og gaf út á sínum tíma fjöldann allan af plötum á áttunda áratugnum, en hún söng einnig hlutverk Róberts bangsa á þremur plötum um svipað leyti. Enn í dag hljóma reglulega í útvarpi lög eins og Simmsalabimm, Tóm tjara, Furðuverk, Orð og Lína ballerína með henni. Ruth býr í Bandaríkjunum og syngur enn reglulega.

Gunnar Þór Jónsson gítarleikari er fjörutíu og fjögurra ára gamall. Gunnar lék á yngri árum með sveitum eins og Kórak en varð fyrst kunnur með hljómsveitinni Spur og lék síðar með sveitum eins og Bravó, Hollívúdd og Sóldögg. Gunnar leikur í dag með Skítamóral.

Jenni Kristinn Jónsson eða Jenni Jóns lagahöfundur átti einnig afmæli á þessum degi. Hann fæddist 1906 í Ólafsvík en kenndi sig þó jafnan við Barðaströnd þar sem hann bjó lengi, hann lék á trommur í Hljómatríóinu en var fyrst og fremst þekktur fyrir lagasmíðar sínar sem margar eru kunnar enn í dag. Á meðal lag sem hann samdi eru Brúnaljósin brúnu, Ömmubæn, Hreyfilsvalsinn og Lipurtá. Jenni lést 1982.

Að síðustu er hér nefnd Katrín Viðar (Einarsdóttir Norðmann) píanókennari og hljóðfæraverslunareigandi (1895-1989). Katrín nam píanóleik í Berlín sem þá var fátítt, og kenndi hér heima í ótal ár, þá stofnaði hún og starfrækti um árabil hljóðfæraverslun undir eigin nafni sem hún seldi síðar Sigríði Helgadóttur en sú átti eftir að reka verslunina enn lengur. Katrín var móðir Jórunnar Viðar tónskálds.