Afmælisbörn 25. janúar 2015

ingólfur Steinsson

Ingólfur Steinsson

Fjölmörg afmælisbörn koma við sögu á þessum merkisdegi:

Ingólfur Steinsson tónlistarmaður frá Seyðisfirði er 64 ára, Ingólfur gerði garðinn frægan með Þokkabót á sínum tíma en hefur einnig leikið með sveitum eins og Lubbum, Stemmu, Krás, The Icelandic duo og Bræðrabandinu auk þess að hafa gefið út sólóplötur.

Sveinbjörn Grétarsson gítarleikari (Bjössi í Greifunum) er 48 ára, hann er þekktastur fyrir framlag sitt með Greifunum frá Húsavík (áður Special treatment) sem hann hefur starfað með síðan um miðjan níunda áratug síðustu aldar en hann hefur einnig starfað sem trúbador.

Ragnheiður Eiríksdóttir eða Heiða í Unun eins og flestir þekkja hana er 44 ára. Hún hefur komið víða við í tónlistinni, var í Unun, Heiðu og heiðingjunum, Hellvar, Dys og fleiri sveitum og hefur einnig komið fram undir nafninu Heiða trúbador. Hún hefur sungið í Eurovision undankeppnum og gefið út sólóplötur.

Snæbjörn Ragnarsson söngvari, bassaleikari, gítarleikari og sjálfsagt eitthvað meira er 37 ára, hann er í hljómsveitunum Skálmöld og Ljótu hálfvitunum en var einnig í sveitum eins og Innvortis og fleiri slíkum. Hann hefur verið viðloðandi leikhústónlist.

Helga Ingólfsdóttir semballeikari (f. 1942) hefði einnig átt afmæli á þessum degi en hún lést árið 2009. Hún var í forsvari fyrir Sumartónleika í Skálholtskirkju, lék með Sinfóníuhljómsveit Íslands, Kammersveit Reykjavíkur og gaf út fjölmargar plötur bæði ein sem og í samstarfi við annað tónlistarfólk. Helga hlaut heiðursverðlaun Íslensku tónlistarverðlaunanna 2005.