Afmælisbörn 6. febrúar 2015

Hildur Vala

Hildur Vala

Af nógu er að taka í afmælisbarnaflóru dagsins og hér kemur skammturinn:

Jón Páll Bjarnason gítarleikari er 77 ára, hann fæddist á Seyðisfirði en fluttist síðar til höfuðborgarsvæðisins, lærði á ýmis hljóðfæri en gítarinn varð að lokum hans aðal hljóðfæri. Hann lék með ýmsum hljómsveitum s.s. KK sextett, Hljómsveit Andrésar Ingólfssonar, Hljómsveit Björns R. Einarssonar og Hljómsveit Ragnars Bjarnasonar áður en hann söðlaði um, fór til Svíþjóðar og síðar Bandaríkjanna þar sem hann starfaði um árabil. Jón Páll flutti heim aftur um aldamótin, gaf út sólóplötu og aðra í félagi við Ólaf Gauk en hefur að auki leikið inn á tugi platna. Hann var annar eiginmaður Ellyjar Vilhjálms.

Signý Sæmundsdóttir sópransöngkona er 57 ára en hún hefur sungið inn á fjölmargar plötur, meðal annars með Bergþóri Pálssyni og sem einsöngvari með kórum. Hún hefur einnig raddþjálfað og stjórnað söngkvartettnum Út í vorið og kammerkórnum Ópus 12 / Kammerkór Þorgeirs.

Einar Tönsberg er 42 ára, hann hefur gefið út plötur og leikið með ýmsum hljómsveitum og undir ýmsum nöfnum en þar má nefna Cigarette, Lorien, Didda, Eberg, Óðflugu og Feldberg en hann hefur einnig starfað við kvikmyndatónlist og gefið út tónlist í félagi við aðra s.s. Pétur Ben.

Hildur Vala Einarsdóttir söngkona er 33 ára, henni skaut á stjörnuhimininn þegar hún sigraði Idol stjörnuleitarkeppnina 2005 og í kjölfarið gaf hún út tvær sólóplötur, hún hefur fengist við fjölbreytileg söngverkefni eftir sigur sinn, leysti Ragnhildi Gísladóttur af í Stuðmönnum og sungið á fjölmörgum plötum ýmissa listamanna.