Blúshátíð í Reykjavík 2016 – miðasala hafin

Blúshátíð í Reykjavík 2016Blúshátíð í Reykjavík 2016 er framundan og er miðasala hafin á Miði.is.

Að vanda verða þrennir stórtónleikar á Reykjavík Hilton Nordica í dymbilvikunni, miðvikudags- fimmtudags- og föstudagskvöld, þar sem fram kemur blústónlistarfólk í fremstu röð. Dúndrandi stemning verður á Klúbbi Blúshátíðar á hótelinu eftir alla stórtónleika þar sem allt getur gerst.

Hægt er að kaupa svokallaðan Blúsmiða en hann veitir aðgang að öllum þremur stórtónleikunum á Hilton Reykjavík Nordica. Takmarkað magn Blúsmiða er í boði.

Dagskrá Blúshátíðar í Reykjavík 2016 verður sem hér segir:

Blús í miðbænum – laugardagur 19. mars

Setning hátíðarinnar á Skólavörðustíg, bílasýning, grill hjá Ófeigi gullsmið og blúsdjamm milli klukkan 14 og 16, tónleikar í Borgarbókasafni klukkan 16 til 17 o.fl.

Rithöfundadjamm í miðbænum – sunnudagur 20. mars

Á Borgarbókasafni klukkan 15 – 16 verður rithöfundadjamm og sagðar blússögur – Chicago Beau, Árni Þórarinsson, Einar Kárason og Ólafur Gunnarsson.

Blúskvöld Café Rosenberg – mánudagur 21. mars

Blúskvöld verður á Café Rosenberg klukkan 21 – 23, Strákarnir hans Sævars og Siggi Sig, og Tómas Ragnarsson og Götustrákarnir koma fram. 

Blúsdjamm Blúskjallaranum – Þriðjudagur 22. mars

Blúsdjamm verður í Blúskjallaranum hjá Íslenska Cadillac klúbbnum frá klukkan 20 til 22. Davíð Þór Jónsson, Tryggvi Hubner og fleiri koma fram.

Stórtónleikar á Hilton Reykjavík Nordica – miðvikudaginn 23. mars kl. 20:00

Blúsjöfurinn Chicago Beau, heiðursgestur hátíðarinnar, kemur fram á opnunarkvöldinu með Vinum Dóra. Chicago Beau var tíður gestur hérlendis á árunum 1991 til 1995 og hann ferðaðist með hljómsveitinni víða um lönd. Nú getur áhugafólk um blústónlist endurupplifað galdurinn sem ávallt verður þegar Chicago Beau og Vinir Dóra spila saman.

Fyrir hlé verður gítarblúsinn í aðalhlutverki þegar Sigurgeir Sigmundsson og Draumasveitin spila lög af plötu Sigurgeirs í bland við blúsa frá Deep Purple og Garry Moore. Í Draumasveitinni eru kanónur á borð við Ásmund Jóhannsson á trommur, Jóhann Ásmundsson á bassa, Þóri Úlfarsson á hljómborð og stórsöngvarann Pál Rósinkranz.

Ungliðarnir í Primecake hefja tónleikana, það er flott byrjun á góðri hátíð.

Stórtónleikar á skírdag Hilton Reykjavík Nordica – fimmtudaginn 24. mars kl. 20.00

Candye Kane kom eins og hressandi hvassviðri inn í blúsheiminn þar sem tekið var eftir henni frá fyrsta degi. Eftir að hafa gefist upp á námi í óperusöng skellti hún sér af krafti í pönktónlistina en áttaði sig síðar á að blúsinn var hennar. Candye Kane hefur hlotið margvísleg verðlaun fyrir tónlistarsköpun sína og hún hlakkar til að koma á Blúshátíð í Reykjavík.

Gítarleikarinn Laura Chavez hefur verið kölluð arftaki Stevie Ray Vaughn og hún stendur fyllilega undir því, kraftmikil og ljóðræn í senn. Áhorfendur um allan heim hafa kolfallið fyrir spilagleði og líflegri sviðsframkomu þeirra.

Þorleifur Gaukur munnhörpuleikarinn knái hefur verið við tónlistarnám við Berklee háskólann og hann hefur dregið til landsins félaga sína úr skólanum. Þetta eru blúsmenn framtíðarinnar sem kalla sig Berklee youngbloods og hita upp fyrir Candye Kane og Lauru Chavez

Dagskráin hefst með Reykjavík Hipshakers, velmannaðri stórsveit sem matreiðir ferskan blús með kryddum úr Boogie Woogie og Ska tónlist með dassi af brassi.

Stórtónleikar föstudaginn langa Hilton Reykjavík Nordica – 25. mars kl. 20.00

Rjóminn af íslenskum blústónlistarmönnum kemur fram á lokakvöldi Blúshátíðar og bjóða upp á fjölbreyttustu íslensku blúsveislu sögunnar. Meðal flytjenda má nefna Andreu Gylfadóttur, KK, Ragnheiði Gröndal, Halldór Bragason, Guðmund Pétursson, Björn Thoroddsen og fleiri og fleiri og miklu fleiri. Þetta verður sannkölluð árshátíð íslenskra blúsista.

Það er leitun að bandi sem er meira töff en Hráefni sem hefja leik á lokakvöldinu. Valdimar Örn Flygenring syngur og spilar á gítar, Þorleifur Guðjónsson plokkar kontrabassa, Bergþór Morthens gítar og Þórdís Claessen lemur trommur. Það þarf ekki að segja meira.

Blúshátíð í Reykjavík er styrkt af Reykjavíkurborg www.visitreykjavik.is

Blúshátíð í Reykjavík er styrkt af Tónlistarsjóði