Afmælisbörn 24. febrúar 2015

Guðrún Á. Símonar1

Guðrún Á. Símonar

Fimm afmælisbörn eiga þennan dag:

Karl Jónatansson harmonikkuleikari er fyrstur á blaði en hann er hvorki meira né minna en 91 árs. Karl er frá Blikalóni á Melrakkasléttu þar sem mikil harmonikkuhefð ríkir, hann byrjaði tíu ára að leika á harmonikku opinberlega, fyrst einn síns liðs en síðar með hljómsveitum. Hann hefur gefið út fjölmargar plötur einn og með hljómsveitum sínum, einnig kenndi hann lengi á nikku og rak Almenna músíkskólann. Karl var einn hvatamanna að stofnun Félags harmonikkuunnenda og stofnaði einnig tónlistarklúbbinn Akkord sem einnig var útgáfufyrirtæki hans.

Engilbert Jensen söngvari og trommuleikari er 74 ára en hann er auðvitað þekktastur sem söngvari Hljóma, Trúbrota og Ðe lónlí blú bojs. Lög á borð við Bláu augun þín, Heim í Búðardal, Leyndarmál og Hamingjan eru öllum kunn. Hann var einnig í öðrum sveitum sem gerðu það ágætt s.s. Saxon kvintettnum, Tilveru, Júdasi, Óðmönnum og Áhöfninni á Halastjörnunni. Engilbert gaf út sólóplötuna Skyggni ágætt árið 1976.

Reynir Gunnarsson saxófónleikari úr Dúmbó og Steina frá Akranesi er 67 ára gamall. Hann hefur lítið fengist opinberlega við tónlist allra síðustu árin en saxófónleik hans má þó heyra í söngleiknum Hunangsflugur og villikettir sem Grundaskóli á Akranesi setti á svið en plata kom út því tengt.

Guðrún Á Símonar átti afmæli á þessum degi en hún lést 1988. Guðrún fæddist 1924, lærði söng fyrst hjá Sigurði Birkis en fór síðan til Bretlands til framhaldnáms. Hún átti eftir að syngja um heim allan en mest hér heima, hún var mikill persónuleiki og kattavinur, og eftir hana liggja fjölmargar upptökur og plötur með söng hennar. Enn heyrast um hver jól lög af jólaplötu hennar og Guðmundar Jónssonar sem út kom 1975.

Sigurbjörn Þorgrímsson (Bjössi Biogen) hefði einnig átt afmæli á þessum degi en hann lést 2011 aðeins 35 ára gamall (f. 1976) Biogen var raftónlistarmaður, starfaði einn og einnig í sveitum eins og Weirdcore, Ajax og Seiðbandinu. Hann gekk einnig undir nöfnunum Babel og Aez og gaf út tónlist undir öllum listamannsnöfnum sínum.