Afmælisbörn 25. febrúar 2015

Þorsteinn Eggertsson2

Þorsteinn Eggertsson

Í dag höfum við tvö afmælisbörn:

Þorsteinn Eggertsson textaskáld, teiknari og tónlistarmaður er 73 ára gamall en þekktastur er hann fyrir textagerð sína, einkum frá áttunda áratug síðustu aldar. Hann samdi ógrynni dægurlagatexta sem flestir þekkja enn í dag en þar má nefna Slappaðu af, Ég elska alla og Er hann birtist, sem eru auðvitað bara pínulítið sýnishorn af því sem hann hefur samið. Þorsteinn lærði teikningu í Danmörku og var klárlega einn af fyrstu plötuumslagahönnuðum landsins en hann var einnig söngvari í mörgum hljómsveitum um 1960, s.s. KK sextett, Neo kvartettnum og Hljómsveit Guðmundar Ingólfssonar svo dæmi séu tekin.

Jón Ólafsson (hinn góði) hljómborðsleikari, söngvari og lagahöfundur er 52 ára en hann hefur víða poppað upp á sínum langa tónlistarferli. Hann hafði verið í fjölmörgum sveitum áður en hann gerði garðinn frægan í böndum eins og Possibillies, Sálinni hans Jóns míns, Bítlavinafélaginu, Fjallkonunni og Nýdanskri en hann hefur einnig fengist við þáttagerð í útvarpi og sjónvarpi frá því um miðjan níunda áratuginn. Jón hefur einnig rekið hljóðver og útgáfufyrirtæki, útsett, spilað og sungið á fleiri plötur en flest annað tónlistarfólk á Íslandi.