Jelly systur (1982-86)

Jelly systur 1983

Jelly systur árið 1983

Kvennahljómsveitin Jelly systur úr Kópavoginum starfaði á árunum 1982-86, í kjölfar vinsælda Grýlnanna sem þá voru á toppi ferils síns.

Jelly systur (einnig ritað Djelly systur) voru stofnaðar í Kvennaskólanum í Reykjavík og komu fyrst fram sem skemmmtiatriði á uppákomu í skólanum vorið 1982. Ekki liggur alveg fyrir hverjar skipuðu sveitina þá en líklega voru það Ragna Gunnsdóttir hljómborðsleikari, Elísabet Sveinsdóttir trommuleikari, Sigurbjörg Níelsdóttir bassaleikari, Edda Kristín Reynis söngkona og Íris Kristjánsdóttir gítarleikari.

Vorið 1983 hætti Íris í sveitinni og tók Steinunn Baldursdóttir við gítarnum, og líklega tók Katrín Jónsdóttir við trommarahlutverkinu þegar Elísabet varð ólétt og hætti. Einnig bættist Nína María Morávek í sveitina en hún gæti hafa leikið á hljómborð.

Um haustið 1983 tóku Jelly systur þátt í Músíktilraunum en höfðu þar ekki erindi sem erfiði, komust ekki í úrslit.

Jelly systur

Jelly systur

Næsta sumar (1984) fór sveitin í samstarf með hljómsveitinni Landshornaflökkurum og ferðuðust þær um landið og héldu böll undir yfirskriftinni Rokkgengið. Í því samhengi fóru þær Jelly systur í hljóðver og tóku upp efni sem kom reyndar aldrei út.

Jelly systur störfuðu allt til ársins 1986 en ekki liggur fyrir hvort einhverjar frekari mannabreytingar urðu í sveitinni.