Afmælisbörn 13. apríl 2016

Geirmundur Valtýson 1992

Geirmundur Valtýsson

Afmælisbörn í tónlistargeiranum eru fimm í dag á skrá Glatkistunnar:

Skagfirðingurinn Geirmundur Valtýsson er sjötíu og tveggja ára en hann þarf varla að kynna neitt sérstaklega. Hann hefur til þessa dags starfrækt eigin sveitir frá 1971 en hafði áður leikið með Rómó og Geira, Hljómsveit Hauks Þorsteinssonar og Flamengo. Hann hefur gefið út á annan tug platna og hafa mörg þeirra notið vinsælda, þekkt er einnig framlag hans til undankeppni Eurovision hér heima.

Brynhildur Oddsdóttir er þrjátíu og sex ára gömul í dag, hún er söngkona Beebee and the bluebirds en hefur auk þess að leggja stund á söng- og gítarnám lokið námi í tónsmíðum við Listaháskóla Íslands. Brynhildur starfar sem tónmenntakennari.

Jónas Tómasson tónskáld átti einnig þennan afmælisdag. Hann fæddist 1881 í Fnjóskadalnum en bjó mestan part ævi sinnar á Ísafirði þar sem hann vann mikið frumkvöðlastarf í tónlistarlífi bæjarins. Hann stofnaði t.a.m. vísi að tónlistarskóla í bænum sem var fyrstur sinnar tegundar á landinu, kom að stofnun Sunnukórsins og Karlakórs Ísafjarðar og stýrði þeim í áratugi og var organisti við Ísafjarðarkirkju í hálfa öld svo fátt eitt sé nefnt. Jónas lést 1967.

Pétur Sigurðsson tónskáld frá Sauðárkróki (1899-1931) átti líka afmæli á þessum degi. Skagfirðingar hafa haldið minningu hans á lofti með ýmsum hætti, Skagfirska söngsveitin hefur t.d. haft lög hans á efnisskrá sinni og einhver þeirra gefið út á plötum sem og karlakórinn Heimir, sem Pétur stjórnaði reyndar um tíma.

Og síðastan skal hér telja (Guðmund) Rúnar Júlíusson (1945-2008) bassaleikara, söngvara, útgefanda og margt fleira, frá Keflavík. Hann gaf út fjölda sólóplatna, stofnaði og rak útgáfufyrirtækið Geimstein, og var í Hljómum og Trúbroti, frægustu hljómsveitum bítlaáranna. Hann var einnig í Ðe lónlí blú bojs, Geimsteini, Rokkhljómsveit Rúnars Júl og GCD, svo nokkrar aðrar sveitir séu nefndar og hefur af mörgum verið nefndur sem einn mesti töffari sem íslenskt tónlistarlíf hefur alið.