Afmælisbörn 24. apríl 2016

Sigursveinn D. Kristinsson

Sigursveinn D. Kristinsson

Fjögur afmælisbörn eru á skrá Glatkistunnar í þetta skiptið:

Friðrik Karlsson gítarleikari og lagahöfundur er fimmtíu og sex ára, hann hefur í seinni tíð sérhæft sig í nýaldar- og jógatónlist en var á árum áðum í hljómsveitum eins og Ljósin í bænum, Módel, DBD, Gigabyte, Doddi og Eyrnastór, Heart 2 heart, N1+, Kvintett Ólafs Helgasonar, Stjórnin, Tívolí og Mezzoforte en sú síðast talda er reyndar enn starfandi. Friðrik hefur starfað síðustu árin á Bretlandseyjum sem virtur session leikari.

Bára Grímsdóttir kórstjórnandi og tónskáld er einnig fimmtíu og sex ára í dag. Hún hefur stýrt kórum eins og Valskórnum, Kór Snæfellingafélagsins, Kór MR, Samkór Vestmannaeyja og Skólakór Hamarskóla en hún er tónmenntakennari að mennt auk þess að vera tónskáld. Bára er í tónlistarhópnum Emblu og starfrækir dúettinn Funa ásamt eiginmanni sínum. Verk hennar hafa m.a. komið út á plötum Funa og Hljómeykis.

Sigursveinn D. Kristinsson (1911-90) tónskáld og tónlistarfrömuður frá Ólafsfirði átti einnig afmæli þennan dag en hann er hvað þekktastur fyrir tónlistarskóla þann sem nefndur er eftir honum og hélt upp á fimmtíu ára afmæli sitt fyrir tveimur árum. Hann kom einnig að stofnun Tónlistarskóla Siglufjarðar og Lúðrasveitar verkalýðsins en stofnaði einnig kóra norðanlands og stýrði þeim. Sigursveinn var frá unglingsaldri bundinn við hjólastól en það aftraði honum ekki til stórra verka.

Halldór Kristinn Vilhelmsson einsöngvari fæddist einnig á þessum degi árið 1938. Hann nam söng við Tónlistarskólann í Reykjavík og kenndi síðar við hann. Hann söng í ýmsum kórum, þar má nefna Pólýfónkórinn, Einsöngvarakórinn, Karlakórinn Stefni og Kirkjukór Akraness, og var einn af stofnendum Íslensku óperunnar. Halldór Kristinn lést 2009.