Cranium

Dauðrokksveitin Cranium var stofnuð 1990 af Sigurði Guðjónssyni gítarleikara (Fallega gulrótin o.fl.) og Ófeigi Sigurðarsyni bassaleikara og söngvara (Moondogs).

Sveitin kom úr Reykjavík og tók m.a. þátt í Músíktilraunum Tónabæjar 1992. Meðlimir Cranium voru þá þeir áðurnefndur Sigurður og Ófeigur, Hörður S. Sigurjónsson trommuleikari, og Björn Darri Sigurðarson gítarleikari.

Hljómsveitin tók aftur þátt í tilraununum árið eftir og þá hafði Bjarni Grímsson (Leaves, Inflammatory o.fl.) tekið við trommunum en að öðru leyti var hópurinn hinn sami. Sveitinni gekk mun betur í þetta síðara skipti, komst í úrslit og hafnaði að lokum í þriðja sætinu á eftir Yukatan og Tjalz Gissur.

Það sama ár, 1993 kom út snældan Abductium í takmörkuðu upplagi, með fimm lögum, þar var Árni Sveinsson (síðar kvikmyndagerðarmaður) orðinn söngvari sveitarinnar og Egill Tómasson gítarleikari auk Sigurðar, Ófeigs og Bjarna.

Cranium starfaði í töluvert breyttri mynd á árunum 1994 til 95, þá voru í sveitinni ásamt gítarleikurunum Sigurði og Agli þeir Viðar Örn Kristínarson bassaleikari, Unnar Snær Bjarnason trommuleikari og Júlíus [?] en Ófeigur var þá hættur.

Cranium starfaði með enn frekari mannabreytingum árið 1996 undir nafninu Oratorius konungur gullfiskalandsins og einnig gæti sveitin á einhverjum tímapunkti hafa gengið undir nafninu Captain of death.

Abduction var endurútgefin löngu síðar (reyndar þá fjögurra laga), annars vegar á kassettuformi af Into it records árið 2023 og svo hins vegar á vínylplötu formi ári síðar af Reykjavík record shop – síðarnefnda útgáfan hafði að geyma lögin bæði í stereo og mono.

Efni á plötum